faire lo clown sens L (episodi 5)

Es una pichota femna. La capoliera clown. Tota rossèla. Tota pichoneta. Que t'agacha amé l'agach precios dei comedians: Un agach intelligènt, sople, concentrat, que cerca lo mot precis. Un agach que cerca la gèsta preciza. Una intelligéncia dau cos. Una intelligéncia que me manquèt dempuèi l'an pèbre. Quora rintres sus lo platèu, delimitat per un fiéu, dins ton vestit de palhassa, la capolièra Clown te respecta: te ditz Monsur vo Madama, que jamai degun te parla pas plus coma aquo dins la vida. As un nas roge. De bralhas largas. Un tricot jaune e regat d'abelha. Una casquèta de Gavroche. Penses a Buster Keaton. E siés ja un autre. La capoliera clown faguèt naisser, de sa fisança, un bèu personatge. Un ravi de belèm, content de descubrir lo monde coma un nene. Qu'aima la vida. Lo lume dau projector lo pivela. Lo decor de la vila quilhat sus la scèna lo pivela. A enveja de lo tocar, lo calinhar, tot es pivelant, tot l'estracina. Car mon autre clown, que descubre d'un cop, es un sensuau! Ma fista! Un enfant sensuau! Vei lo public. A enveja de lo tocar, de lo prene dins sei braç. Aima tocar lo platèu, bracejar lo decor, seguir lo fiéu dei projectors amé sei detons. Mercés a la Capolièra. Una pichota granda femnda qu'a una capeladura fantastica. Que comprene pas coma se fa un chocrota coma aquo. Amé de barretas? Lo mistèri de la femna clown.