Lo Grau, Calon, François Truffaut, Doinel, e ieu.

Lo libre abriva la memòria

Lo libre deis edicions Ramsay èra pausat sus la chaminèia de Grau. "Le tene de ma cambra d'enfant, me diguèt, ma maire voliá l'escampar ambé mei posters de Mickael Jackson, de Madonna, de Barbara Streisand". 

Ai de chança d’aguer un collèga coma lo Grau. Perque lo Grau es coma Calon. Es afogat de Truffaut. E que ieu, sensa me n'avisar, siáu estat abalit per Truffaut en Vidèo 2000 puei au Cinèma de Minuit de FR3, e enfin en VHS.

 Promier, Truffaut li siáu anat pichòt perque dins sei films i aviá Dorothée (dins L’Amour en fuite). E que Dorothée trevava mei nuechs e mei dimecres d’après miegjorn. Te trufes pas. Tot fa cultura e avèm l'erotisme que podèm, banasta...

Educacion per l'imatge. Crese que regardave L’enfant Sauvage a la television publica deis annadas 80 (quora fasiá cultura) dins de colors verdas e jaunas d’Antena 2. 



E m’ère identificat an aqueste Victòr.Victòr lo sauvatge. Coma èu : ère l'incomprés. L’incomprés dei cors de recreacions qu’ambé sei blocatges provinciaus imatginave coma una sèuva. Finala, m’auriá agradat de m’escapar dins la forèst coma aqueu pichòt que sabiá la lenga dei valats, dei flors e deis aucèus. Subretot per escapar au mèstre a l’accent ponchut jogat tras que mau per lo realizator.  E l’enveja de viure nus, de me faire possar lo pèu me prusiá fòrça en beure mon Poulain.

Jovent, aprenguère l’amor romantic amb Isabelle Adjani e ma man drecha (mens pesuga qu’una telecomanda d’epòca). Aprenguère l’art dau rastèu dins l’Histoire d’Adèle H.  E es an aqueste moment que m’avisère que l’Amor èra impossible. Ò qu’èra un problèma d’èstre fiu de… per s’amorosir. Mai ère pas lo fiu de… Victor Hugo. Just fiu de … pròf. Sabe pas de qu’es lo mai grèu… M’identificave : L’istòria de Tam T… E Sandrine Savitry sortiguèt ambé Tristan Chouflu, de la cinquenca cinc.

Per clavar sus l’enfáncia, i aguèt aquela operacion greva dins l’espitau dei bònei sòrres (mai perqué ma maire laicarda, m’aviá-ti mandat aicí ?) Lo film dau dimenge de ser, dins l’odor de la compota de pomas e de mon darnier supòt, fuguèt : Vivement Dimanche. Fuguère pivelat per lei cambas de Fanny Ardant dins un negre e blanc tras qu’estetisant, lo biais leugier qu’aviá de contar un crimi m’aviá pivelat.

E enfin, estudiant en Letras Modèrnas e Occitan, puei per preparar lo concors de la FEMIS, per perdre de temps que l’aviáu pas au programa,  legiguère la correspondéncia tota de Truffaut au Livre de Poche (ara agotada), pegat au cagador, pivelat per la larguesa dau personatge e son mestier d’escritura. Èra una excusa per m’evitar de revisar mentre que ma mia de l’epòca recitava tot Rabelas e la Biblia de còr per l’espròva de literatura. « Antoine Doinel… Antoine Doinel… Antoine Doinel », tòrna dire lo personatge principau dins una lònga tirada. Quant de còps me trobère davant mon mirau en dire, coma l’eròï, avans que de trobar l’assegurança que me mancava sus lo camin que me menava a la fac : « Mat Tam… Mat Tam… Mat Tam… » Sensa Truffaut, sensa ma lectura apregondida, benlèu que sariáu escenarista ò pròf d’occitan.  Ara fau « agent de viatge ».

Ma VHS preferida èra aquela de la seria Antoine Doinel. Lo Cinèma de Minuit  intelligent aviá començat per  la difusion d'Antoine et Colette ambé Rosy Varte dins lo ròtle de la maire. 



Un film cortet e autobiografic de François Truffaut. Ambé son doble de Cinèma, lo grand Jean Pierre Léaud (alòr jovenet). Trobave que jogava « jazz ». Sempre en contra-temps. Ambé un don d’improvisacion desvariat. Lo Miles Davis de la comedia, qué ! Son francés ponchut (inconegut au mieu, que semblava an aqueste dau mèstre de Victòr) èra musicau, exotic. M’espantava. M’agradava. M’agradan totei lei Doinel, perque vesèm evoluir lo personatge. E comprenguère mai tard qu’èra èu l’enfant bèu de Les 400 coups (non, es pas un film ambé Clara Morgane, te mesclas).

Ara, siáu preissat me fau partir. La vila d'Agradà es en festa. Lo soleu me sòna. Contunharai mon tèxt mai tard.

De seguir… 

Se siam trobats ambé mei gents dins la vila d’Agradà. Elei que creson que patisse de la solesa, decidiguère de lei menar dins ma bauma secreta. Au restaurant l’Ola, ma cantina, mon nis, mon batèu mieu,  mon « companhs d’abòrd ». Sabe pas s’avètz ja menat vòstrei gents dins d’endrechs que vos son pròpres, d’estanquets, onte fasètz vòstra vida intima e … Enfin brèu…  Dempuei nòu ans que ne’n parle pas, decidiguère de dubrir plan planet lei cortinas sus mon quotidian de pirate. Promier episòdi. Un  quotidian de festa au restaurant l’Ola onte perde meis oras a charrar, a beure, a oblidar l’òbra de mai en mai complicada de l’Agéncia de Viatge. Coma de costuma lo cosinier, mon collèga, mon amic, aviá de tascas de sang sus lo faudau, lo cantaire de flamenco bramava en luòc de cantar, la carriera (que sembla a ren) èra ben ronhosa coma fau. Lo mond me sonavan per mon pichon nom (tot lo restaurant). Tam ! Tam ! Tam ! Un poton Tam ! Coma anam ? Sòrtes aqueste ser ? Aquò rassegurèt ma vièlha maire que siguèsse conegut e pas solet. Au mens dins aqueste luòc. E avèm manjat coma de reis una ensalada amb un uòu mimòsa e de la carn de buòu biò de la manada sabe-pas-que e sei fregidas ostau, una mossa de caramèu, de fromatge blanc ambé de marrons. Mamà èra urosa (doas miejas-botilhas de vin, mai l’avèm ajudada) de conèisser lo jornalista, sa femna, lo grafista e lo restaurator. Pasmens Lo Grau èra absent. Èra a recaptar. A pausar son Ramsay Poche sus la caminèia.

L’idèa de crompar dins aquesta vila se preciza. Luenh de la negror de la Vila-de-Tam ais idèas fascistas. Dins lo soleu de la festa de la vila d’Agradà, mei gents comprenguèron lo bonur d’èstre environat de collègas, de fraires causits per lo còr. Lo vin de taula fuguèt fòrt e nos trabalhèt lo ventre quora lei laissère au parcament.

Lo Grau me sòna. Sus lo camin, m’entòrne a ma critica personala e intima sus Antoine Doinel. Es lo percors d’un òme de l’enfáncia fins a son divòrci. Leis imatges e lei remembres de pelicula me tòrnan forra-borra a cada pas que fau.  Davant lo restaurant asiatic pense a l’episòdi que  Doinel s’amorosís d’una polida japonèsa.  Puei vese una camioneta de liurason de la pòsta. Ma tèsta vira : omenatges a JacquesTati dins aquest immòble parisenc onte lei floristas colorizan lei flors. Lo rire, l’autoderision, aquesta semblança de libertat m’agradan dins un art mestrejat de cineasta-romancier, l’esperit surfant sus l’èr freg de la feria de setembre. Es an aqueste moment que campaneje en cò de mon collèga. Escota lo radier disc dei Inrocks. Fa lo programator culturau. Ai fòrça enveja de charrar cinèma. Mai que mai de Truffaut. Estudiant Lo Grau aviá contactat la familha de l’autor, sa femna, per realizar un omenatges ai Mistons ambé Bernadette Laffont. A l’epòca totei lei liceans obravan ambé l’òme-camèra Jean Malige, un de Montpelhier qu’aviá filmat lo promier filmet de Truffaut e lo chin de Royal Canin, sariá estat interessant de l’entrevistar per lo documentari. Enveja de charrar d’aquò… Mai perqué Lo Grau aviá agut l’acòrd e perqué lo viratge aviá cabussat ? Cinèma. Cinèma. Enveja de charrar de cinèma. E benlèu de partejar un DVD de Truffaut sus lo radassier. Meis uelhs corron lèu sus la videoteca. E qué vese pas sus sa chaminèia (i a ges d’asard) ? Un libre polit mai polit que non sai ! Negre (granda qualitat de presentacion, lo negre es de bòn gost per parlar cinèma), lei paginas jaunidas presas per leis odors de tenchas e de poussa, categoria tres, leis Edicions Ramsay ! Una belòia!

 Leis edicions Ramsay es un periòd estudiant. Aviáu, me sembla ( me desencusaràs son pas que de remembres imprecis) obrat sus « lo film negre per Gatlif ». Leis edicions Ramsay es evidentament lo libre deis entrevistas Hitchcock – Truffaut. Una referéncia !

Ramsay Poche Cinèma. Leis estudis cinematografics èran ponchuts. M’avián ajudat per estudiar Florian Vernet dins una mestria dedicada ai romans policiers. 

Un estudi comparat ambé l’autor geniau dei policiers e l’univers dau genre. Leis edicions Ramsay fasián de la cultura populara, e doncas dau cinèma, dau film policier, dau film negre, un art seriós, menimós, que s’adreiçavan a una joinessa de gaucha qu’aviá set de cultura. Ara la joinessa es de drecha e a set de blu marina. Caricature. Perdon.

 Bonur dau libre cinematografic deis edicions Ramsay. Lei cofrets DVD existissián pas, nimai lei filmes a gratís dau telecargament illegau ! E doncas un libre que recampava, per l’escrich, la trama romanesca  fasiá mirelha ! Perque la projeccion dei films de Truffaut se ne’n trobava rara, me pivelava de descrubrir una pieda escricha.

 Dubrisse lo tresaur dau filmibritge. Coma Truffaut es un escrivan socitós, cada escenàrio es acompanhat de sa promiera esquissa e de sei nòtas. Es explicatiu, pedagogic. Un libre que fau tornar editar ! Quau saup çò que son leis Edicions Ramsay devengudas ? Se Ramsay Poche Cinèma existís sempre ? Qué fa l’IEO per ne’n crompar lei drechs ?

Crese qu’avèm charrat una ora ò doas sus lo libre, sus Truffaut. Avèm agachat lo mèstre dins un film de Spielberg.



 Lo soleu se fasiá feble dins lei cortinas rojas de l'apartament agradenc.  Alòr siam sortits. La feria d’Agradà comença aquí. Mai es un film de mai.

  

L'art dau retrach: François Ozon

François Ozon a son univer pròpre. Luenh dau carcan cormerciau dei cadenas de la TNT francesa que tuga son cinèma a pichòt fuòc dins son  quite país, lo cineasta coma un François Truffaut (sa referéncia) contunha de seguir sa dralha. Ansin Jeune et Jolie presentat sus la Croseta au mes de mai reverta per lo nòstre plaser lei tèmas e luòcs e personatges preferits de l’autor : la plaja, la mar, la desirança, lei femnas, l’abséncia, lo fosc sexuau, lei trevas. Mai çò que pertoca dins aquò es l’art dau retrach. La camèra vira, revira a l’entorn de la polida Isabelle, 17 ans. Retrach monstruós," trabalhat" (au sens medecinau) d’una jovença desvariada per lei cambiaments de son còs e de son còr sec.  Coma dins una granda òbra, lo racònte es pas çò important e es pas nimai sa resolucion que nos agrada (se i a resolucion, crese pas que lo realizaire a la pretencion de nos porgir una respònsa). Nani. Çò que nos pertoca es coma François Ozon, amb estile, capita d’impausar son arma dins cada plan, dins un buf sensible (signa la realizacion e l’escenàrio). Pensam a un personatge centrau. Aqueu pichòt fraire, testimòni de l’istòria de sa granda sòrre, es benlèu èu, es benlèu nos. Siam benlèu Ela, aquela jovença perduda dins lei messòrgas deis adults. E finala, coma patissèm totei de «bovarisme »,  « joines e polits » es –ti pas un pauqueton nosautres ? Un film coma un mirau.

L’utilizacion dei cançons de Françoise Hardy sotalinha l’art dau retrach adolescent.  Lo radier tròç sus dei paraulas justas de Michel Berger (C’est moi) porgís de precisions sus la dolor que malauteja au dedins. Coma de la literatura fina fina. 

Film en francés.

Jeune et Jolie es a l'ora d'ara dins lei salas. De mancar pas.

Architectura de l'illa de Chios

Aquela illa, situida a uech quilomètres de la riba turca, vei naisser Homère e inpira Hugo per L’enfant Grec dins Les Orientales. Dins la vila de Pyrghi siáu pivelat per l’arquitectura deis ostaus cubèrts de Xistas (que vòu dire « biais de gratar »). Dins l’Eté grec, Jacques Lacarrière descriu la tecnica : « Quora lei peiras d’una faciada son montadas, se reverta d’un promier enduch lèu-lèu que se laissa secar, dessús se passa un segond enduch, lentós. Puei, abans de faire secar aqueste,  se grata per faire lume  sus l’enduch de color de dessota ». Sòrga : Le Guide du Routard, 2008-2009, îles grecques et Athènes.

Lei rescòntres d’estiu son sempre rics. E, lo sabètz : i a ges d’asard ! Lei lecturas sònan lei viatges e lei viatges inspiran lei lecturas.  Brèu… Quora vese Delfilm (aquela sonha mei libres occitans malauts), la religaira dins son talhier freg de libres de Sant-Quentin-la-Terralha, au tornar de mon viatge, me presta lei tres volums de son vesin dessenhator de BD : Le Periple de Baldassare, inspirat dau roma d’Amin Maalouf. E aquí dedins, que vese, durènt lo viatge que mena l’eròï a la quista d’un libre perdut ? La vila de Pyrghi ! Dessenhada ambé una mestria que non saup. L’apèu de Grecia, sempre e sempre. Meme dins lo mai pichonet vilatjon de França ! Lo cant de serena d’aqueste país jamai calarà ?

 L'enfant per Victor Hugo

"Ô horror ! horror ! horror !",
W. Shakespeare, Macbeth

Les Turcs ont passé là. Tout est ruine et deuil.
Chio, l'île des vins, n'est plus qu'un sombre écueil,
Chio, qu'ombrageaient les charmilles,
Chio, qui dans les flots reflétait ses grands bois,
Ses coteaux, ses palais, et le soir quelquefois
Un choeur dansant de jeunes filles.

Tout est désert. Mais non ; seul près des murs noircis,
Un enfant aux yeux bleus, un enfant grec, assis,
Courbait sa tête humiliée ;
Il avait pour asile, il avait pour appui
Une blanche aubépine, une fleur, comme lui
Dans le grand ravage oubliée.

Ah ! pauvre enfant, pieds nus sur les rocs anguleux !
Hélas ! pour essuyer les pleurs de tes yeux bleus
Comme le ciel et comme l'onde,
Pour que dans leur azur, de larmes orageux,
Passe le vif éclair de la joie et des jeux,
Pour relever ta tète blonde,

Que veux-tu ? Bel enfant, que te faut-il donner
Pour rattacher gaîment et gaîment ramener
En boucles sur ta blanche épaule
Ces cheveux, qui du fer n'ont pas subi l'affront,
Et qui pleurent épars autour de ton beau front,
Comme les feuilles sur le saule ?

Qui pourrait dissiper tes chagrins nébuleux ?
Est-ce d'avoir ce lys, bleu comme tes yeux bleus,
Qui d'Iran borde le puits sombre ?
Ou le fruit du tuba, de cet arbre si grand,
Qu'un cheval au galop met, toujours en courant,
Cent ans à sortir de son ombre ?

Veux-tu, pour me sourire, un bel oiseau des bois,
Qui chante avec un chant plus doux que le hautbois,
Plus éclatant que les cymbales ?
Que veux-tu ? fleur, beau fruit, ou l'oiseau merveilleux ?
- Ami, dit l'enfant grec, dit l'enfant aux yeux bleus,
Je veux de la poudre et des balles.

Victor Hugo, Les Orientales, 1829

Dessenhs tirats de:

Joël Alessandra, Le Périple de Baldassare: Un ciel sans étoile, Casterman, Paris, França, 2012.

La botiga de Delfilm, religaira es:

Delphine Dejean, Le Livre dans la peau, Reliure et Restauration, 7 rue de la fontaine, 30700 – Saint Quentin La Poterie.

Fotografias de Chios:

 Lo Tam-Tam
Tèxt:
Victor Hugo, L'enfant in Les Orientales.

Viatge conegut e aimat

Sempre sus mon vèlo en suspencion sus lei paluns assecadas de la pichòta Camarga. Deman anarai veire lei resclausas dau Pichòt Ròse. Es mon viatge preferit. Aqueste que passe cada jorn ambé mon paire. Per aprofiechar de sa sapiéncia e de son entrainament fisic. La Miegterrana nos recampa. E mancariáu pas un jorn d'estiu per viure aquò. Siam una minuta d' aqueste país, papà!
Le lendeman, finala après lei resclausas contunham sus la via de terra que perlonga la D63 (Palavàs, Carnon, Lo Motàs). Se dubris a nautres un paisatge bèu. Lo camin dèu surament menar a Seta. Un farandola de cabanas, lei "cabanas dau Ròc" dubrisson leis uelhs de mon telefonet. Maugrat lo solelhàs assage de faire mon mielhs per vos. E bastir de remembres novèus ambé lo paire.

Lei cabanas d'aicí ecologicas ambé de teulissas solarias ò plus ancianas, fachas tot just de fustas pintadas ambé la crotz occitana ò la crotz camarguenca. Lei estajants parlan fòrts dei merinjanas de miegjorn culhidas dins l'òrt. E tot aquò me tòrna a Grecia.

Television: thalassa

França tres prepausa un documentari sus leis illas escondudas de la Mar Miegterrana. Tres illas pensadas, inventadas au gost dau jorn per d'arquitectes, òmes de sciéncias, rics eritiers. Totei amorós de dòna Natura. De descubrir sus lo siti internet de la cadena ò en segonda difusion sus la TNT. Fabulós!

 http://www.france3.fr/emission/51f2f658bb94783ff20f4d3a

Lo pescaire qu'avètz sus ma fotografia es pas d'una illa esconduda mai lo pescaire de mon illa aimada qu'es Mitilena. Un personatge fòrt de la familha que m'aculhís lei braç dubèrts dempuei 5 ans!

Felipe Carrese, Malaterra

Dissabte 19 de genier a 15h50, sus F3, redifusion de "MALATERRA"
lo filme de Felipe CARRESE
(bilengue occitan-francés/sota-titolat)


Un filme que conta la vida d'una familha de paisans dins leis Aups de Provença Nauta (virat a "Noyers-sur-Jabron" 04) dau temps de la promiera guerra mondiala... sus d'un fons d'espionatge...

Acteurs : Laurens Revest, Roger Pasturel, Claire Massoubre, Estelle Pessemesse, Franck d'Aloiso, Léa Coulanges. Durée : 95 minutes Réalisateur : Philippe Carrese.

Pendant la guerre de 14-18, en Haute Provence, une famille qui vit en autarcie, et dont l'univers est essentiellement composé de femmes depuis que les hommes sont partis au front, entretient d'étranges rumeurs de malédiction autour de Malaterra, un village abandonné soi-disant hanté. L'arrivée d'un vagabond sourd et muet va exacerber les conflits individuels, chambouler la vie quotidienne dans cette ferme isolée et révéler le mystère de Malaterra, le village maudit. En Occitan et en Français.

Arte

Deman: granda jornada tematica sus Grecia.

Ma fotografia mòsta un endrech onte nade fòrça.

Marchar, marchar

Marchar, marchar. Per oblidar lei mostres que siam...

Rescòntres d'Arle. Talhiers, resto, autorota.

La jornada s'acaba dins lei talhiers. La calor cala. Es lo promier còp que fasèm lei rescòntres d'Arle sensa l'impression d'un grand lassitge. L'organizacion, la coeréncia de l'ensems nos an convençuts. Capitam pas de laissar Arle. Manjam dins un restaurant suau que se ditz Fad´Òli.  S'inventa pas nimai.
 Lo paure vesin de taula, dei gròs braç, se tròba solet subran. Comprenèm que son amiga ven de lo laissar. Lo temps d'un flash.Eu, saup pas se dèu continuar lo repais qu'a comandat ò la seguir. La seguís.
La veitura que nos tòrna cap a la Vila de Tam breça Calon que se rementa deis imatges de jovença dei clichés retrobats dei camps rodanencs dau frònt popular puei d' aqueste còs torçut, perdut dins lei montanhas, dins un paisatge d'aubes que sembla a d'esculpturas. Dins sa tèsta la polida fa son montatge.

Lei talhiers vesita guidada

Calon e ieu volèm seguir la vesita guidada dei Rescòntres d'Arle. La guida nos aculhís ai talhiers . Tres univers dispariers, dins tres membres gigantàs: lei fotografs Minkkinen e  Tillmans. E una mòstra tematica: una soscadissa sus l'Africa.

Prene de nòtas en dirècte. Me seguissètz?

Promier membre. Arno Rafael Minkkinen òbra sus son còs nus coma s'èra un paisatge. Performància dangeirosa. Lo dangier coma processus artistic. Lo patiment lo marca. En argentic. Fòrt. Espectacular. Poetic. Se tòrça dins de posicions impossiblas. La vida de Minkkinen es una dolor. Marcat per son bec de lebre mostrarà sa cara soncament a la debuta dei annadas   2000. Comencèt dins leis annadas 70. 43 ans ara que fa de recercas sus son còs sensa relambi. Calon es marcada per  tant de beutat.

Seguís puei 12 fotografs d'Africa de Sud : transicion, paisatges d'una societat. Malaisat de passar d'un univers a l'autre, pense. Mai la guida es pedagòga e fòrça interessanta, joina, polida, saberuda. Ai pas retengut grand causa aquí... Levat lo bòn biais de la guida.

Tresen e radier membre: L'univers de Tillmans.

Wolfgang Tillmans comença la foto dins leis annadas 80 perseguit per la mòrt de sei pròches en causa dau sida va assajar de crear un ensems magic, non mestrejat de la fotografia. Astronomia, fotografias dau mond, abstraccion, registre dau quotidian: un brave mescladís! Assaja de comprene lo mond dins sa globalitat e critica ansin lo tròp plen de la mondializacion. Pivelant. Fotos numericas tròp precizas.

Sortissèm d'aquela vesita fòrça las mai urós. Es un bòn plan: la vesita guidada dins lei talhiers es a gratís!

Bestiari d'Arle

Ambé Calon, fau la pausa de Tarzan davant lo rinò ròse dei rescòntres d'Arle. Coma se l'aviáu caçat.

Foto auto-mat

Ambé Calon avèm fach de foto-mat-ons au foto auto-mat

Pierre Jamet, lei talhiers

Remembres negres e blancs dei vacanças dau Frònt Popular sus Ròse. Tocant. La mòstra preferida de Calon per la jornada.

Erik Kessels, palais de l'archevêché

Òbra: 24 oras de fòtos. Onte una mar gigantassa, ersa de tiratges fotografics, raca d'un balcon interior. Coma per dire un tròp plen d'imatges... de mancar pas.

Sergio Larrain, gleisa Santa-Ana

Lo chilian qu'arresta de faire de fotografias mentre qu'intra a l'agéncia Magnum. A 40 ans.

La sosta, plan Doumer

Manjar au restaurant La Sousto. En Arle, aquò s'inventa pas.

Lee Fan, Capitòli.

Afortis lo zen de l'Italian.

Mat dins lei carrieras

A l'asard bautasard dei carrieras d'Arle se tròba un grafista que se ditz Mat.

Giuseppe Penone, capela Sant-Martin dau Mejan

Escuplturas fabulosas inspiradas per leis aubres. Leis fotografias negras e blancas fan resson a la soscadissa d' aqueste grand poeta de la natura.  Amb 
impression personala de grand zen.

Mòstra Jaar, gleisa dei fraires presicadors

Existis pas de fotografia que mòstra Nelson Mandela que plora lo jorn de sa desliurança. Dison que la lutz dau calcari li leva la possibilités de plorar.

Festenau de la fotografia d'Arle

Anar querre Calon que m'espèra a la gara d'Agradà per lo festenau de la fotografia d'Arle. La montaira de cinèma ven dins Sud (es ansin que sona lo pais) per descubrir la colleccion en negre e blanc.

Imatges d'endacòm mai

Sus leis ecrans blancs dei cinèmas d'art et d'assag:  Baie des Anges de Jacques Demy, en version restaurada. Negre e blanc fabulós. Jeanne Moreau perduda a Niça la bela dins lei Casinos e lei taulas de jòc. Un cap d'òbra.

Sus lo pichòt ecran d'Arte: aqueste ser. Shaft de Gordon Parks. 1971. Promier film de la blaxploitation.   20 o 45.

Sus lei malhums sociaus e quauquei cadenas de television d'Ongria:  4 corts metratges sus lo racism anti-ròm: la color de sa pèu èra son solet pecat. 

Sòrga: Liberation d'aquesta dimenjada.