Aguère aqueste tantossada una telefonada de l'amiga Liza. Liza la cantaira qu'aviau escrich son promier disque e que vos aviau parlat. Es sempre un plaser de partejar d'idèas de musicas e de cançons novas amé l'Artista. Liza, ara, es a viatjar ai States. Laissa pas França, pasmens. E contunharà de cantar la lenga d'oc, ço que li fa l'originalitat de sa personalitat artistica. Ara, vos l'aviau dich, Liza a madurat e sa musica es mai linda e mai joiasa. Mai ritmada. E trabalha amé de musicaires coma aquo! Coma l'aviau explicat a l'amic Plantevin, un autre amic cantaire, trabalham ara, lei tèxtes a l'anglo-saxona: Tot joga sus la musicalitat, lo ritme e mens sus lo sens. D'imatges precis. De sons precis. Es coma aquo, me sembla, que Gainsbourg a capitat. E aquo balha d'espessor a la cantaira e a sei compausicions. Siau fan de ço qu'avèm fach darnièrament ensems: La dança dau Matagot, Solesa, Parle a la Luna (que sembla un cant d'indians d'Americas).
Aguère crenta, quora aprenguère que Liza laissava lo pais. Parla un anglés perfiech e la lenga passarà mielhs enlai. Mai que mai per faire mestier: cantar anglés es mai aisat! Doncas es acabat per mon pichot trabalh de paraulier? E ben... non. Tot ara me diguèt qu'èra pas sa toca. Leis americans son afogats dei lengas dau monde. E contunharà, la chata, d'impausar la lenga! La polida fa la guida de viatge e fa cantar Provençau dins lei carris! Imaginatz un rican que mastega sa goma sus Pichon Monde. Mort de rire!
Alara, Liza va partejar sei cançons entre lei States e Occitània. Nos laissa pas tombar! Esperèm lèu l'album venènt que sarà mai ric! E encara e totjorn en Occitan!
Ara fau trapar lo bon productor que nos pagarà aquela joia. Perque lei cançons que venon son de joias!
Cap comentari:
Publica un comentari a l'entrada