dimecres, 4 de febrer de 2009

la libido, es son creno (que d'alas per un quiéu, sason 3, episodi 2)

Siéu tombat sus una novèla clown. Una libidinosa d'una atge cert, mai una libidinosa. Sembla a Regina. Coma la cantaira. La libido, es son creno a Regina. Cada cop que dèu improvisar, sus l'empont, que que siegue lo subjècte de l'impro, dubris grand sa boca, freta sei bregas amé la lenga e brama mai o mens fort"MMMMMMMMMM!oooooooooc! coco boyyyyyy!". "Regina, fai lo capeiron roje""mmmmmm! occccccccccc! coco boyyyy!rhaaaaaaa lovely". "fai una impro sus una caça au tresaur""mmmmmmmm! occcccccc! coco boy! rahhhhhhhha lovely! pren me sus l'armari". Promier jorn doncas. La capolièra clown nos escampa un objècte e devèm improvisar amé. MDR. La cap me bota en parèu amé Regina (dos que la tenon, tres que la....)E l'objècte fuguèt: lo tudèu d'una pompa a velo! OC! UNA POMPA A VELO! Leis autres an una bala, un libre, una pelucha, un filme de plastic que fa de lofas. E nosaustres aquesta puta de pompa. I pas de asard! L'exercici: ieu tene l'objècte e lo deve faire viure coma una mariota. Ma partenaria darrier dèu me seguir en faire la voés de l'objècte. E vaqui que fau bolegar ma pompa coma una sèrp. E Regina:"mmmmmm". "mmmmmmmm". Dins mon jogging, aquèste bruch me geinava. Falié tener una mieja ora amé lo tudèu e Regina darrier que me fasié de "mmmmmmm", de "aaaaaa", e que sabe ieu. Troba d'idèia tu per faire viure ton tudèu! Idèia: emboite la coa dau tudèu dins sa tèsta. Ma sèrp fa una bloca. E aqui fuguèt insotenable sus l'empont. Regina fasié de bruchs de bregas. Debruchs de bregas e de potons. E mon tudèu se fasié una autofelacion dins son imaginacion. E la cap clown qu'arrestava pas l'impro. Quora l'impro s'acabèt, creguère morrir: Regina per me mercejar m'estofava entre sei popas.

dimarts, 3 de febrer de 2009

que d'alas per un clown, sason 3, episodi 1

Estage de clown 3. Es articulat sus lo conte. La chorma es mens opressada per la toca de faire sa creacion personala. Aquela idèia, finala, avié blocat la nostra imaginacion. Ara s'agis de faire d'impro sus un subjècte donat. Aièr, faguère mon promier solo. Coma un grand. Falié improvisar sus aqueste conte fiolosofic seguènt: Una granolha proche d'un riu. L' escorpi vou traucar lo riu. Demanda a la granolha de va faire sus son esquina. La granolha refusis. Non. Non. Vas me picar. T'assegure que non.  Te fau fisança, alara. Passejan dins lo riu. Au mitan de la passejada, sensa s'en avisar l'escorpi pica la granolha. Veses qu'om pou pas te faire fisança. E se negan dins lo riu. Morala filosofica: siam de longa victima de ço que siam.
Alara falié brodar a despart dau conte. Youkaidi. Vestit de clown. Ren de preparat. Improvisar sus lo moment. Sus la scèna se troba una pompa per lei pneumatics. Urosament. Ai pas d'idèia. Ere solet sus l'empont. Falié ben trapar una companha imaginaria. De la pompa faguère un dacos a opium. E inventère la granolha que tubava son opium. E coma se conflava d'opium, mancava de longa de petar, ma granolha. Avètz ja fach tubar una granolha? L'efiech marchèt sus lo public.  M'abrive dins la colissa. Ara fau l'escorpi. Totjorn amé ma pompa a pneumatic.  Ara la pompa es ma coa. L'escorpi es libidinos. E parla amé la granolha tubaira. Après l'impro s'es desconflada. Se passèt mau aqui. Sabiéu pas plus que faire. E racontère l'istoria amé un fum de gèstes parasits. E siéu sortit de la scèna amé ma pompa pneumatica coma s'èra un gos. Aviéu perdut ma granolha, mon escorpi e mon istoria.