dimecres, 25 de febrer del 2009

Levinson Barry



De qu'a passat? (Titre originau : What Just Happened?)


"Inspirat de la vida dau productor de Fight Club et d'Into the Wild, aquèste filme recampa un polit casting bailejat per De Niro." Disponible en VOD, tre ara.
Realizat per Barry Levinson Amé Robert De Niro, Catherine Keener, Sean Penn, Bruce Willis Estats-Units 2008 1h46mn
D'après lo libre d'Art Linson, publicat en 2OO2.
Un filme per leis amoros dau grand cinèma american. Per lei amoros dei mesas en abimes. Una leiçon de cinèma. Entre lo Darnier Nabab (Kazan) e La nuech americana (Truffaut). Sus lo ton de la comedia, lei tracàs vertadiers d'un productor de cinèma entre divorci, capricis d'actors (Bruce Willis dins son quite rotle, remirable) e angoissas dau finau cut (valent-a-dire la rompedura finala, la fin dau film decidida per un "panèu" d'espectators abans la difusion vertadièra dins lo resèu cinematografic). Un filme clafit d'autoderision. Una fotografia subrabèla. Lo raconte es inspirat per lo realizator Art Linson. Nos monstra tanben lo monde crudèu qu'es Alholivod. De Niro magistrau coma dins un film deis annadas 70. De veire tre ara.

caponitge contemporanèu


Aguer lo caponitge ne pas anar veire l'amic d'enfancia que perdeguèt son paire subran, un ser de febrier. Fa pas de tu un retrach joios. Fa de tu un egoiste. Egoiste que siés coma ta generacion tota. Es aquo que me dirié mon papà, totjorn viu e vident. Quant egoiste! Non. Pas de lagremas. Aquelei dau temps retrobat de se tombar l'un lautre dins lei braç après d'annadas d'amistats perdudas o d'amistats kleenex. Dempuèi quant de temps se siam perduts de vista per egoisme contemporanèu? Arribar au moment que la familha dolorosa se plora. Justament mau tombar. Pas trapar lei mots. Pas trapar lei gestes. Ieu, decidiguère de tombar pas. Pas au moment qu'avian benlèu besonh de ieu.Ieu. Ieu. Ieu. Ieu, siéu pas aparegut au cementèri. Ieu, aviéu perdut lo numèro de telefon. Ieu, escriguère una letra aquesta tantossada. Ieu, finala, per me desencusar de mon caponitge. Ieu, per exprimir mei sentits. Que la mort deis autres me fa paur. Ieu, coma sabe pas faire, ieu coma sabe pas èstre, ieu, escrive a la man, per la familha dau mort. Estilo negre. Caponitge. Pas de pluma. Un 045 Reynolds Fine Carsure. Made in France. Ieu, caponitge, escrive. En franchimand, per lei familhas. Caponitge. Fau de polits viras-viras amé la lenga de Molièra. Fau lo bèu. Caponitge. Caponitge. Caponitge. Oc. Prene de pausas de faussari. Caponitge. Caponitge. Me dise que van m'aimar mielhs. Ieu, ieu, ieu. Suremant. O autrament per que l'amistat reviscole. Pasmens me dise que dise benlèu de causas justas.

Qu'aquela mort m'anoncia lo regret d'una amistat gastada. Qu'es tant viva. Parle dau regret de pas plus faire de musica amé l'amic. Que m'avié agradada, a passa temps, aquela maquista de cançons originalas qu'aviam registradas amé lo paire a la technica. Amé lo paire a la technica que defuntèt un ser de febrier. Un ser de febrier, coma un aventurier au Maroc. Aquel ome remirable que m'encoratjava (benlèu un dei solets sus tèrra) dins mon narsicisme egoiste d'artista que se cercava dins lei miraus escurs. Un èstre positiu defuntèt. Un ser de febrier. Dins Maroc onte volié se crompar un ostau. Son-ti seis ersas positivas que me manda? A ieu, ieu, ieu. Son-ti seis ersas positivas de desert salat coma una pagina blanca? Que me dison: "Contunha! Se necita pas de plorar am'elei! Manda ta letra! E prepausa a mei gents de tornar prene la guitara bassa, d'alucar lo micro sus on. D'alenar tei mots sus lo micro. Benlèu que parlaràn de ieu sens va saupre. De mots e de regrets, n'ai pas de besonh. Que meis ondas saràn dins la guitara bassa de mon fiéu. Me'n vau amé lo vent. E lo cop que ven, en luoc de faire de letras, benlèu qu'auràs lo coratge de te rendre a mon enterrament vo de conservar l'amistat forta amé mon fiéu. Aquel egoiste."

obras

(c) Fotografia originala dau Tam, 2009.


Es tarrible aqueu recanton de Camarga qu'èra mieu. Leis obriers fan de nhacas d'en pertot. Quitram e gip manjan tot. Quitram e gip, especialitats occitanas. Dabans l'ostau, li avié una robina e son camp de vinha. Ara, de tudèus sorton de la tèrra coma d'Aliens tombats d'una autra planèta. Aqueleis èstres de plastic manjan tot. E ronhan sus mei pantais de cicliste. Li aurà d'ostaus Bouygues a la plaça. Ma maire me parla d'un comissariat. Un comissariat per qué? Per susvelhar leis alambics ? Lei becarucs? En facia de l'ostau polit, li aurà un comissariat. E lo camp grand dau chivau camarga, envasit per la sanha dequé n'en faràn? Una gabia per lei raubaires? Vo lei pantaissaires de natura sauvatja? Ara, au vilatge, an un conse d'esquèrra. Podrié s'opausar en totei aquelei bastisons. Lo paire, qu'es regde per educacion, un artisan dau centre (mai pas gaire politizat), troba tot aquo normau. Fau ben logar lei gens ara. Onte lei metriam se fasiam pas d'ostaus? Dins d'HLM?...


Mon paire. T'an pegat un ostau chantili contra lo pin grand. Dins ton jardin. Aquel ostau nos regacha, coma leis ostaus modèrnes dins lei filmes de TATI. Mon paire, aquel ostau confle de sucre, que sembla a l'ostau de Na Tartina, trobes normau que te manjèsse leis uelhs? E lei vesins, dins la cort qu'anave jogar amé Micolau, aquela cort dau cèu blu, son remplaçats per de gigants amenaçants qu'empachan a tota enfancia de s'escapar. Auriam pas grandit, benlèu, dins la libertat se aquelei bastissas s'èran presentadas aqui. Parlem pas, mon paire, de l'equilibre ecologic redusit a una politicas de grandeis obras.


E lo paire de me regachar.E de me dire: Es ansin.

dimarts, 24 de febrer del 2009

Fincher David

La granda Cate Blanchett

Estats-Units, De David Fincher, Amé Brad Pitt, Cate Blanchett, Taraji P. Henson, Julia Ormond, Jason Flemyng… Escenario : Eric Roth. Musica : Alexandre Desplat. 2o44. 2009


Es un conte polit. Leis efiechs especiaus son pertocants e demoran au servici de la narracion. Lo biais de faire venir joine vo vièlhs leis actors es espantant. Istoria d'un ome que nais vièlh e morris joine. Una soscadissa sus lei raports amoros e sei dificultats: L'atge, sei diferéncias e l'erosion de l'amor dins lo parèu. Granda sagà americana amé totei seis ingredients: exotisme, erotisme soft, soscadissas sus l'amor-l'amor, narracion dicha per una voés off, referéncias a l'actuItaliquealitat e au sègle, qué sabe? Un gènre que justifica sa longor. Proche de 3 oras. Om pensa a Autant en Emporte le Vent e Titanic. Lo realizator es un grand. Faguèt Fight Club Seven e Alien 3. Fuguèt lançat dins leis annadas 9O per la cantaira pop Madonna per un clip proche de l'expressionisme alemand: Express yourself. Fincher es a s'alunhar d'aquel estetisme que faguèt sa marca un temps fa. Pasmens son filme novèu demora una capitada.