dijous, 1 de març del 2007

barraduro


L AGENCI DE VIAGE ME MANDO EN RUSSIO PER QUINGE JOUR. LOU TAM SARA BARRA. TOURNARAI APRES. A LEU.
Sorgo: Li foto en negre e blanc de la Russio soun sus:
Clicas dessus, es forço bèu!

diumenge, 25 de febrer del 2007

buster keaton au pont dau gard

Un troç de film de Buster Keaton


Una fuelha morta esperant a l'entrada dau Pont dau Gard la projeccion dau filme.
Lo siti dau pont dau Gard coma una BD de Schuitten



Leis aubres esperan tanben la projeccion.














L'aficha de la serada. La clopa defora.

Rendut-compte dau film
Bòna serada au Pont dau Gard onte avèm descubert Lei Tres Atges de Buster Keaton. Lo film es estat presentat sota una forma modèrna. Un grop de musica electronica situit a senestra de l’ecran blanc dins una sala bela dau monument èra encargat de faire l’ilustracion sonora coma a passa-temps. L’avián ilustrat de mesclatges interessants.
L’istòria dei Tres ages :
Es l’istòria simpla de l’amor en tres temps : lo temps preistoric, lo temps antic, lo temps modèrn. Avisatz-vos un pauc dei variacions que posquèt faire lo Buster Keaton en traucant leis atges ! Lei vestits (aquèste de l’òme dei cafornas vau lo còp amé una capeladura qu’auriá pas desagradat a Mirelha Matieu vò Jana D’Arc…), lei decòrs negres e blancs, leis animaus ( un faus leon e un dinosaur en plastic dins lo biais « pixilacion »). Lei tres tablèus son montats en parallèle amé d’anacronismes flames. E levat un pichòt vela sus la pelicula, l’umor dau filme foncciona totjorn.
Una performancia de Circ :
Es degut a la prestacion tarribla e corporala de l’actor realizator. Coneissèm totei l’istòria dau Buster Keaton que fasiá tombar d’ostaus sus èu. L’imatge èra estat reglat au milimètre près. Sensa aquò l’artiste riscava la mòrt. Sensa filats ! Trobam dins Lei tres atges lo gost de Keaton per lo risc e lo dangier. Lo passatge lo mai espectacular es lo onte son personatge sauta d’un imòble a un autre. Me sembla dins un reportatge sus lo film mut d’aver comprés que tot aquò èra fach en plan sequéncia sensa rompadura e que faliá capitar dau promier còp ! Lei amators de Jackass assajan ara de tornar copiar aquò mai sensa l’ambicion poetica que dona de la valor artistica ais imatges.
Om tròba en cò de Buster Keaton lei qualitats d’un òme de circ. Es un domdaire : l’òme preistoric se fa rebalar per un elefant, lo roman fa abançar son car amé l’ajuda de sei chins (e non pas de chivaus). Per lei faire abançar a estacat un cat a un baston… Quin circ ! Es un magician : lo fau veire desapareisser dins una gabina telefonica per tornar apareisser dins un carri ! Enfin, es un acrobat. Plega, tòrsa son còs coma s’èra de mastagoma. Vò ! Lo mai impressionant es de veire coma l’òme fa de performancias corporalas. Es un dançaire que se laissa jamai anar a l’espectaclós mai se met au servici de l’istòria.

Impressions de mesclatges :
Ara fau parlar de la musica ausida aqueste dissabte de ser. Lo grop Radiomentale acompanhava lo film. Cresiáu, ieu, d’ausir de l’experimentau. E m’apreparave a un marrit moment. Me remembre d’una adaptacion d’un Nosferatu dins un cinèma onte la musica te fasiá pensar a un duò Clayderman-Jarre. E ben aquí… Non ! Era d’una qualitat granda, la musica. E coma lo Keaton, lei musicaires presents se son mostrats au servici de l’istòria muda. Lounge, Jazz, Transa, totei lei particions causidas e seis efiechs èran lei benvenguts. Un dei musicaires jogava amé una boita de ritmes en dirèct per cada cabussada, cascada, e desaparicion de l’actor magic. Lo trabalh lo mai fin èra aquèu dau jòc amé la pelòcha. Cada còp que lo vièlh film (pasmens restaurat e mostrat aquí dins sa version DVD) se grafinhava, se traucava vò se cramava coma un parpalhon de nuech, a cada nafradura dau temps, lo musicaire inventava un son novèu.

Conclusion :
Es sempre un eveniment de veire un film mut dins una sala vertadiera de cinèma amé sei musicians. Per ieu, èra un pantai. Fau dire qu’aquí lo cinèma tòrna prene sa dimension promiera d’art instantanèu e d’experimentacion. Experimentacion de la debuta d’un sègle, lo sègle dau cinèma onte tot èra a trobar, cercar, melhorar e provar. Un art promier e pionier. De la debuta tanben de nòstra epòca onte la musica furna dins un univers de sons electronics que son de lònga dins la cerca abstracha coma ilustrativa. L’experiéncia per lei Tres Atges èra ja estada facha per un grand de l’electrò, l’an passat. S’agissiá de Jeff Mills.

Ficha tecnica :Lei Tres Atges
Un film de Buster Keaton & Edward F. ClineAmé: Buster Keaton, Margaret Leahy, Wallace Beery, Lilian Lawrence, Joe Roberts, Lionel Belmore, Horace Morgan, Blanche Payson.Titre original : Three ages. Durada : 65 minutas.
LO DVD : Edicions DVD MK220 de setèmbre de 2005
Genre : Comedia Fantastica .Durada : 1 o 04.Es lo Promier long metratge realizat per Buster Keaton en 1923. Keaton cita lo classic de D. W. Griffith (Intoleréncia virat en 1916) perque son film se compausa en tres moments istorics. Produccion originala : Metro Pictures & Joseph Schenk . Edicion DVD : MK2 . Participacion : CNC (France). Referéncias : EDV 1264 Premsa: MK2 França, Jean-Baptiste Péan (Paris). Siti de crompas internet prepausat : Amazon - Les Trois Âges & Coffret Buster Keaton. Prètz indicatieu : 22 euro.
Lo siti dau Pont dau Gard :