dilluns, 13 de desembre del 2010

lo fotograf

quora diguère que deman li aurié un fotograf per una conferéncia sus lo cinèma dins mon atalhier, la secretaria ponchejèt dei popas. Pareis que fa de l'efiech lo mestier de fotograf.

diumenge, 12 de desembre del 2010

per animar l'entrepresa

A l'Agéncia de Viatge onte obre, aviéu costuma de faire l'animacion entre 12 oras e 2 oras. Meis animacions podian durar fins a 6 oras lo ser quora lei burèus s'amossan, que lei radiators calan mai que leis emplegats e gadas an pas enveja de tornar a seis ostau, a sei femnas, a seis enfants, a seis omes, a sei solezas, a sei nevrosis arcolicas o - pieger - televizadas. Lo solet argument èra per ieu: "oc, lo talhier, lo fau a gratis, soncament se parla la lenga nostra". Ara qu'avèm chanjat la directritz (aquela que se cura lei dents amé lei ponchas bic), l'Agéncia de Viatge - ben pardina - se dèu faire dins la lenga de la republica. Alara, crentos que siau de l'autoritat es ansin que decidiguère de monstrar mei promièreis amors: Lo Cinèma. Quet succès... Lei socis de mon club son mai nombros, lo fau dire, que non pas en Occitan. Mai - paraula - coma analizar un film en franchimand? Ma canicha... Quora veguère la chorma m'esperar, regda sus lei cadièras, abans la projeccion de Metropolis, demorère mut. Amossère lo lume, aluquère lo video projector e laissère mon public.