dimecres, 2 de novembre de 2011

Viaule Sèrgi, poèta occitan

Qualques poesias de Sèrgi Viaule a legir aqueste ivèrn, acoconat al radiator !

« Refrescar la lenga »

D’unes se demandan a cridals o de sota-votz, e an rason de se pausar la question, çò que Sèrgi Viaule gasanha o mascanha amb sos tèxtes improbables. Sabon pasmens que lo mot « poesia » ven del grèc ποιεν (poiein) que significa « far/crear ». Pus tard, a l’Edat-mejana, lo trabalh dels mots balharà en Occitània « trobar ». Trobalhar/trabalhar, o pas, la rima e lo ritme. Trobar (e doncas cèrcar) es ben far quicòm o crear quicòm. L’estimacion, l’apreciacion de la creacion es a posteriori un autre parelh de margues. Las esteticas van e venon.

Dins son accepcion la mai larga, tot trabalh sus la lenga pòt èsser de poesia. Dins l’òbra de Sèrgi Viaule la poesia es una art del lengatge per çò que fa una utilizacion maximala, e totes azimuts, de la lenga. Dins un tèxte, tanlèu que i a expressivitat lengagièra, se poriá dire que i a poesia. Cresèm poder avançar que l’expressivitat es pas çò que far freita dins l’òbra de Sèrgi Viaule.

« Refrescar la lenga » ? Perqué pas ! Mas cal pas anar quèrre aquí darrèr res mai qu’un vèrs pescat a l’azard dins lo cinquantat de tèxtes que compte aquesta brocadura.

Brocadura de 64 paginas : 6,10 € franc de mandadís.

Coordonadas :

Edicions Lo Clusèl

47, avenguda Charles de Gaulle

81370 Sant Sulpici la Punta

tel 05.63.40.09.33

corrièl : lo-clusel@orange.fr