dissabte, 31 de maig de 2008

Lo Vent de la Mar




« On prend des manières à quinze ans/ Puis on vieillit sans qu'on les perde ». A. Bruant: Lézard.

Lo Vent de la Mar (redaccion)

Es un èr que manca a la Vau-Clusa. País tròp bacelat de vent. Coma se Diéu bacelava la tèrra fruchosa e seis extremas de totei menas. La Vau-Clusa es castigada per trop de violéncia. Sa punicion es lo Mistrau. Quora afranquit de mei guèrras quotidianas tòrne dins Gard i a çò que lo Papet Pèire disiá lo vent de la mar, òc, i a lo vent de la mar que m'espèra. Es un vent nòble qu'a sa particula. De La Mar. Coma un mosquetari de Dumas vò un cònte per l'enfantum. Mon marqués de Carabàs. Vese lei pòrtas dau barri se dubrir per tu: « Monsur lo Marqués dau Vent de la Mar! ». E lei sovenirs s'abrivan.
E dire qu'aquela aura gratava lei gautas rosas dau papet quora partiá sus son velò rovilhat sus lei camins de Pecais per faire de la sopa d'èrba. Una sopa d'indian siós que te netejava. La sopa neteja. Qu'aquò se saup, qu'aquò se ditz. La sopa te neteja lo stomac. Lo vent de la mar a un gost de purja. Lo vent de la Mar a una odor d'enfáncia sola. De camins de tèrras. De camins d'aigas. De robinas saladas. De la sau que se passeja entre tei pèus e tei péus blonds. Lo vent de la mar te fa un trauc a l'estomac. Quora bufa la malaiga dau dimenche de ser. D'aquelei dimenche que te veson morrir e te dònan d'idèias criminalas: se levar nuech una caucetassa sus lo caratge per èstre pas reconeisser e botar fuòc au collège. Lo collège dau centre vila protegit per lei barris e lei marridei nòtas de matematicas. Quora bufa lo brave De La Mar, as pas qu'una idèia: lo tradir. Jovent ingrat! Lo Marqués es generós: la nuech fai auborar de montanhas de saus que crebes d'enveja d'eskiar. E qu'eskiaràs pas que dins tei pantais. Que la sau, aquo te crama. Lo Marqués es generós: te porgis de pantais. Lo vent de La Mar, camarguenc, te protegis deis alambics. Te fa una pèu de cuèr. L'odor dau vent de la mar es l'odor sauvatja dau chivau preistoric, blanc coma una pintura sus una crota. A l'animau! T'agacha passar d'un uelh familhiar en faire sa caga vò en caçant l'alambic que li rosiga l'aurilha. Vaquí tot çò que te pòrta l'èr de la mar: un idèia de merda, de mòrt. En un resumit: es lo vent d'aquela puta de joventut. Mai lo sentir uèi, sota lei lumes aranges de la ciutat mairala endormida, qu'aquò fai de ben!


5 comentaris:

Evalina ha dit...

Osca e mercé per aquel tèxt supèrb !Cresi que vau l'estampar per lo poder tornar legir abans de m'endormir anuèit -dimenge !-
Quin pecat que totes los non-equipats d'internet lo pòscan pas legir : quora te decidiràs a far un libre ? Poiriá èsser una causida de tas fotòs amb un tèxt teu a costat . Per exemple, la primièra fotò en sepià -amb la nèu de sal- seriá subrebèla per illustrar aqueste tèxt.Espèras d'èsser a la retirada ?... Macarèl ! Pensa als joves que son atalentats d'escriches modèrns de qualitat !

Tam ha dit...

es benlèu un pauc complicat. Mecés a Melania vese que siéu capable de dire quaquei causas que semblan creatriças. Mercés au suport dau blog que m'ajuda per la foto e lo tèxt. Es aquela mescladissa - procha de la benda dessenhada, dau cinèma, o de cop que i a de la revista - que va lo mielhs a mei modestas causetas. I lo retrach de mei remembres dins enfancia, mei viatges dins arquitectura dei vilas dau monde, e Ris que se voudrié un grand poèma surreaslist. I a totei aquelei causas mai sabe pas se son abotidas. E sabe pas sota quina forma lei metre per lei posquer publicar. Pode pas me passar de la foto. Pode pas me passar dau tèxte. Finala, lo blog es-ti pas lo suport ideau per mon arma bordelica?

Anònim ha dit...

E n'avètz d'autres? De textes coma aquò?
Polid mai que polid.
Manjacostel.

Tam ha dit...

benlèu... fau ben ben furnar dins leis arquius dau blog tot en bas de la pagina principala, lei tèxtes e lei fotos son classificats per rubrica e capitous. Se trobatz un bon tèxte aqui dedins, podètz quilar!!!

Tam ha dit...

Anem! Una pichota explica per lei capitous. N'i a que son perduts!
* Aile Noire (12)
Fulheton pas acabat en franchimand
* arquiteituro di vilo dou mounde (78)
Mei viatges, mei fotos.
* autour du feuilleton (18)
L'istoria de la literatura populara
* brigitte bergeret (1)
Una artista que m'agrada
* cantairas (16)
Una colleccion de cantairas. Vidas, retrachs, omenatges e cançons.
* cantem dins la carriera (12)
fotos vo filmes personaus de gens que fan de musica dins totei lei carrieras dau monde.
* couleitage (8)
ço qu'ause dire en occitan dins la vida videnta lo marque aqui
* delfilm (6)
es una amiga dau licèu, es venguda religaira, a crompat un ostau per religar sei libres e li fau la pub per la mercejar
* delphine dejean (2)
veire delfilm
* diciounari (21)
un imatgier de a fins a z amé lei marcas de l'occitan dins lei carrieras, lei panèus vo lei paisatges.
* enfancia (38)
lei remembres pregonds de mon enfantum.
* histoire de la chanson (30)
ma passion per la cançon.
* Indianà (12)
l'istoria d'un ome romput per leis aventuras d'amuuuuuuuur
* jo (19)
de jocs, de devinholas, e lo grand joc dau DEKEDIS que fa la bona reputacion dau blog.
* la grande morte (11)
una novèla mieuna, acabada en franchimand.
* la lenga me fai mau (14)
mei colèras politicas e engatjadas.
* li grandi fraso de l'istori
(20)
un trabalh umoristic (?). A despart dei grands retrachs d'ome famos, troba ço que dison. L'avi dau DEKEDIS.
* liza (8)
Una cantaira que m'agrada perque canta de tèxtes tras que polits.
* Lo western (8)
Ma passion per lei filmes americans e lei gardians d'america.
* negre e blanc (171)
Totei leis informacions sus l'Art e la Cultura.
* publicacions (1)
Lei darnièrei publicacions.
* reliure (3)
Veire Delfilm vo Delphine Dejean
* ri (5)
Mon poèma surrealiste.
* rire (32)
Co que me fa rire. Galejadas.
* tamtamthon (compausatz lo 3637) (3)
Per ajudar lo Tam de vièure, compausatz de la musica vo lo 36 37.
* trin (14)
Ma passion per lei garas e lei trins. Tèxtes, fotografias.
* Vila d'Agradà (25)
Ma vida dins una vila pantalhada. Tèxtes e fotos.
* vilo de Tam (43)
La vila onte trabalhe. Vila dangeirosa politicament e que critique. Fotos e tèxtes.

Totei aquelei capitous son en bas de la pagina d'accuèlh.