Una enigma dins lo jardin
Lo crimi se passa un matin. Sonia Petaflor
aiga sei pomas d'amor. Lei sulfata ambé de la bolhida bordelèsa. Per luchar
contra lo Mildiou, la malautiá
dei pomas d'amor. A sei pès se tròba son chin. Sonia Petaflor es fòrça rica. E
a un bel ostau. A un ostau que sembla a un castèu. Lei candelas son d'aur. Lei
cadieràs son de cuèr. La climatizacion reversada dins totei lei membres que
difuís un èr sant. Sonia
Petaflor viu sola mai a quatre veituras. Una per la prima, una per l'estiu, una
per l'autòn, e una per l'ivèrn. Lo doctor
Jòrdi Chale ditz qu'a davalat dins lo jardin li faire un poton puei qu'a
montat dins sa cambra, sota la teulissa.
17 oras dau diluns 13 de mai
de 2013: Sonia Petaflor es trobada mòrta darrier son plant de pomas d'amor.
A costat d'ela: un mocador banhat de sang, un mocador de seda ambé seis
inicialas: SP. Pas de còps de cotèus, just tres nafras de sang sus la gauta
drecha. Coma es mòrta Sonia Petaflor?
Lo detectiu privat, Jan Petasec, passa dins lo
jardin. Remarca a costat dau còs mòrt...
de cisèus! Just a costat dau visatge de Sonia, fendisclat de quatre
bendas de sang, sus la gauta drecha. Mai aquela nafradura pòu pas donar la mòrt.
Aqueste matin, après la mòrt
de Sonia Petaflor: un testimòni passa dins lo jardin mai vei pas Sonia Petaflor.
Es lo factor. La boita dei letras
se tròba entra la figuièra e lo pomier. Lo factor passa a onze oras. Avoa qu'a
pas vist Sonia Petaflor, lo còs mòrt a sei pès. Se concentra sus son corrier a
distribuir. Temps dau passatge: cinc minutas. Pasmens ditz qu'es estat
embestiat per lo chinet que japa. Lo factor a un contracte CDD e ditz que va se
trobar au caumatge a la fin de l'estiu. E pensa au pichòt de Sonia e de son eritatge. E tròba qu'es ben malurós d'èstre pas nascut dins una familha de
rics.
Lo segond personatge que passa
dins lo jardin es son fiu. A pas tres ans. Parla a pron pena. E quora an trobat lo còs mòrt, èra a descopar
d'imatges dins Lo Jornau de Miquet au ras de l'èrba. La mòrta a sei pès. Lei cisèus trobats per lo
detectiu (una analisi de dralhas ADN lo dirà puei) èran per l'enfant. Mai un nenet pòu-ti tugar
sa maire?
Resta la bòna. Ditz qu'a ausit un grand crit
dins lo jardin. Qu'a botat sa tèsta a la fenèstra, qu'es venguda querre sa
patrona. Pasmens Jan Petasec remarca l'I-Pòd sus la comòda.
Lo doctor, Jòrdi Chale, qu'es
l'amorós escondut de Sonia Petaflor arriba dau fons dau membre de l'ostau. Jòga
tot l'argent de la rica femna au poker. Ditz que non. Que la bòna quita pas
jamai son I-Pòd! Que parla pas plus a la
patrona perque la gelosa. E per li levar lo bonjor, resta de lònga dins leis
escotaires de son I-Pòd. L'escota d'a fons e pòu pas aguer ausit lo crimi dins
lo jardin! Perque la considera pas mai. Lo doctor balha un sucre ambé affeccion
au chin. Jòrdi Chale ditz qu'es èu que l'a dreiçat. E Jan Petasec remarca que
lo chin japa jamai. Es normau, segon Jòrdi. Japa soncament en cas d'urgéncia!
Jòrdi Chale fa l'especialista dau còr e examina la nòstra Sonia. Segon èu sariá mòrta d'un arrèst cardiac. Lo
detectiu ditz qu'es una messòrga. Que s'agís ben d'un crimi! Mai lo doctor es-ti copable?
Mai quau a tugat Sonia Petaflor? Perqué lei marcas de
sang sus sa gauta? Perqué pas d'autrei macaduras? Quau es copable?
1 comentari:
Enigma: solucion.
Es un matin de prima. Es dètz-oras e mieja.. Sonia Petaflor, avans l'arribada dau soleu fòrt, decidís d'aigar sei pomas d'amor. Davala leis grands escaliers de fusta. Defòra son leis odors de la prima, dei flors dei mila colors. Banhada per la douçor de mai, canta de cançons d'amor en pensant a son calinhaire, son car doctor qu'es marridat mai que trompa sa femna amb ela. Son pichòt pausat a sei pès jòga ambé sei cisèus. Presa d'un envam d'amor la maire pren lo pichòt dins lei braç per lo potonejar. Lo pichonet a en òdi l'autoritat e la nhafra de tres còps de cisèus sus la gauta drecha. Sonia Petaflor mocada, tòrna pausar son nenet au sòu. Freta sa gauta amb un mocador de seda, que pòrta seis inicialas. SP. E lo banha de sang.
Après l'agotatge, Sonia traita lei pomas d'amor ambé sa bolhida bordelèsa. La bòna agacha per la fenèstra. Es lo sinhau. Dau luenh, arriba lo postier, sonat per la bòna a sa fenèstra. Qué messorguiera aquela! Es verai: la bòna a vist sa patrona mòrta dins lo jardin, de sa fenèstra. Es faus: èra pas dins lo tantòst mai ben après sa mòrt... ò pendent sa mòrt que l'a vista... Es verai: escotava una cançon mortuara dins son I-Pòd per assistir a l'espectacle de son crimi.
La bòna fa signe doncas. Lo chin, dreiçat per aquò, japa per anonciar que la via es liura. Lo postier arriba. Tròba Sonia, lei gautas en sang. Li demanda perque. Engatja la convèrsa. Lo postier pocrita a en òdi lei borgèsas. Eu que va perdre son trabalh. Lei rics, per èu, devrián crebar totei. E lei tugarà totei! Mentre que contunha sa convèrsa ambé la Patrona, la bòna fa signe. Lo doctor, coma l'a anonciat au detectiu, davala dins lo jardin mai en meme temps que lo factor. Mentre que lo postier ocupa Sonia en parlant de la pluèia e dau temps bèu, lo doctor resquilha una agulha dins la bolhida bordelèsa emplida de poison. Lo postier part. Lo doctor monta dins sa cambra ambé lo nenet per lo faire pas respirar lo poison. La patrona tòrna sulfatar sei pomas d'amor. La tèsta li vira. E tomba, mòrta a sei plants de tomatas.
La bòna, lo doctor, lo postier son complicis. Tòrnan pausar l'eiritier au pès de sa patrona per rendre lei piadas foscas. Lo doctor a tugat son amorosa per posquer pagar sei detas de jòc. Lo castèu deviá li apartener après sa mòrt. L'aviá legit sus son testimòni. E coma èra perseguit per lei marrits jogaires, deguèt vendre lo castèu. Una sola solucion? Tugar son amorosa! La bòna voliá tugar sa patrona, tan èra gelosa. Enfin, lo Postier, un paure lèu au caumatge, vòu luchar per la justicia sociala.
Publica un comentari a l'entrada