Foutougrafio: Palais dou Roure. Avignoun
Un jour partirai coume l’ome proumié qu’anara sus la luno. Partirai dóu pais mairau qu’estime tant. En tournant de ma vilo e de ma noublèsso, en laissant moun castèu dóu bres, descubrirai Avignoun pèr soun lengage e si mestié d’à passa-tèms. Siéu l'estangié etèrne. Lis indiano saran escoundudo dins la carrièro di tinchurié. Me prendran d’assau dins un bramadis. Oulouloulou ! E prendrai lis indiano coume pretèste à moun proumié rouman. Pèr eli, vive dins un palais à l’oumbro d’un roure gigantas. Mai es pas proun aventurous. E la pauso es trop longo. E parte adeja coume l’ome proumié sus la luno. Dins un eisoutisme interiour que m’afougo. Western. Western. Western di proumièri pelocho. Siéu l’àvi dóu western en Camargo. Couneisse la lengo dis ome d’aqui, couneisse lou lengage di bèsti, lou lengage de la tèrro, l’alfabet dis aubre, lou tendrun di letro e la sensualita de l’art nouvèu qu’es lou Cinèma. Tout, tout, tout m’interesso. Lis ome. Li pais. E lou marrit sort qu’on laisso i mai saberu que fan pòu perqué sabon sens saupre. Saupre. Counèisse. Aprene. Parteja. Partirai is America. Pèr rescountra mis ami indian. Que, coume iéu, semblon naissu dins la tèrro. Qu’an travaia pèr founda lou pais e se mescla emé la naturo, soun saupre viéure e si diéu pagan. Un jour partirai dóu pais. E dins un Tam-Tam de tubèio, proujeita pèr un fiò de Sant Jan, veiran moun oumbro s’esvani en oumbro chinèso. Oumbro chinèso sus la luno. Sarai lou marqués dis Indian. Tam, en oumenage au Marqués.
1 comentari:
E piòt que siás, as pas besonh d'anar tan luènh ! As pas qu'a te'n venir dins Arièja ! ailà auràs tot per virar ton western : los darrièrs Indians -que son talament vertadièrs que sabon pas solament que son Indians-, d'espandidas de tèrra gaireben verge (mas bon amb tot lo rambalh que i agèt sul sicut de la virginitat, ara me mesfisi dels mots !)que te faràn un decòr en tecnicolòr plan mai bèl qu'a Monument Valley ; de roïnas d'una civilisacion anciana e avalida n'i a per emplenar de quilomètres de pelicula , e se vòls t'ensenharai un dels darrièrs "shamans" que practica encara una religion qu'òm cresiá escantida mas que sas cendres roginejan encara.
Non, te disi qu'avèm pas res d'envejar als Indians d'America...
Publica un comentari a l'entrada